АҚШ ҳукумати Қирғизистонга ёрдамни чеклаши мумкинлиги ҳақида огоҳлантирди
Бунга мамлакатда қабул қилинган “хорижий вакиллар тўғрисида”ги қонун сабаб бўлгани айтилди.
Куни-кеча қабул қилинган “хорижий вакиллар тўғрисида”ги қонун АҚШнинг Қирғизистондаги фуқаролик жамиятига кўмаклашишига тўсқинлик қилиши мумкин.
Америка Давлат департаментининг матбуот котиби Метю Миллернинг бу ҳақдаги баёнотини 3 апрель куни АҚШнинг Қирғизистондаги элчихонаси эълон қилди.
Миллер Давлат департаментининг демократик ва инклюзив Қирғизистон учун зарурий бўлган нотижорат ташкилотлар (НТТ) фаолиятига таҳдид соладиган ушбу қонуннинг қабул қилинишидан қаттиқ хавотирда эканини билдирган.
“Озодлик” Давлат департаменти матбуот котибининг “Бу Қирғизистон расмийларининг демократик бошқарув ва фуқаролик жамиятига путур етказувчи навбатдаги ҳаракатидир”, деган сўзларини келтиради.
Миллернинг фикрича, ушбу қонун НТТлар учун ортиқча даҳмаза бўлиб, Қирғизистон халқига турли ташкилотлар, жумладан АҚШ томонидан ҳам кўрсатиб келинаётган муҳим ёрдамни жиддий чеклаши ёки йўққа чиқариши мумкин.
Эслатиб ўтамиз, Қирғизистон президенти Садир Жапаров 2 апрель куни “хорижий вакиллар тўғрисида”ги қонунни имзолаган эди. Қонун эълон қилингандан 10 кун ўтиб кучга киради. Бунгача ўнлаб маҳаллий ва халқаро ташкилотлар Жапаровга мурожаат қилишиб, ушбу қонунга вето қўйишга чақиришган эди.
Шунга қарамай ҳужжатни имзолаган Садир Жапаров бунга қадар Қирғизистонда фаолият юритаётган нотижорат ташкилотлари ҳеч қаерда рўйхатдан ўтмасдан, ўз фаолияти ҳақида ҳисоб бермай юришганини иддао қилади.
Унинг фикрича, мамлакатда фаолият юритаётган нотижорат ташкилотлари халқаро донорларни ҳам алдаб келишган, шунинг учун ҳам улар “хорижий вакиллари тўғрисида”ги қонун имзоланишига қарши чиқишган. Жапаров бу қонун ёрдамида мамлакат расмийлари “барча бир хил шароитда ишлаши учун ҳамма нарсани очиқ кўрсатиш”ни истаётганини қўшимча қилган.
Қирғизистон парламенти ушбу қонунни 14 март куни учинчи ўқишда қабул қилган. Бунга қадар халқаро ва Қирғизистондаги ташкилотлар депутатларни бир неча бор қонун лойиҳасини қабул қилмасликка чақиришган. Уларга кўра, мазкур қонун лойиҳаси жамоат ташкилотлари учун жиддий хатар туғдиради ва фуқаролик жамияти фаолиятининг асоссиз равишда чекланишига олиб келиши мумкин.
Таҳлилчи ва ҳуқуқшунослар Қирғизистоннинг “хорижий вакиллар тўғрисида”ги қонуни қарийб тўлалигича Россиянинг “хорижий агентлар тўғрисида”ги қонунидан кўчириб олинганини қайд этишган.
Оқбура, Бишкек.
Расм интернетдан олинди
